Wednesday, December 26, 2007

Disyembre 25, Aggapo Dixon CA

Itan ti petsa dagiti kanalbuong
Iti amin nga suli ditoy lagip. Itan
Ti panagsasallupang dagiti rupa,
Dagiti Isem, kidday, alamanu, arakup,
Ti panagpupulapul dagiti katkatawa,
Ranyag ti silsilaw, karoling ti ubbing,
Bibingka, linapet, puto, pancit,
Ti panagtayab dagiti asok ti kuskusina,
Ti panangraut dagiti angot ti karkarruba,
Ti panagidasar ti atang kadagiti altar,
Ti panagpasyar dagiti babarkada
Ditoy panunot ko. Itan ti iyuumay
Da lelang ken lelong, da aunti ken uncle,
Dagiti kabagyan aggapu diay sursurong
Iti kaputotan. Sumangbay da aminen
Ditoy panagmaymaysak ket matedtedtedanen
Ti rikna iti maburburiburan nga lua. Itan
Ti panagmamano dagiti inanak ti bunyag,
Ti panagsangbay ti ragsak kadagiti lamisaan,
Ti panagiparaman kadagiti kabkabaelan,
Ti panagparintumeng dagiti nangato,
Ti panagiparabur dagiti addaan. Itan
Ti pananglapsot kadagiti gura ken sakit ti nakem,
Ti panangibaba kadagiti punyal ken paltog
Iti bakrang ti barukong. dimteng'akon sadiay,
Ditoy Pusok. Agnanaednakon sadiay,
Ditoy ulimek ken lam-ek
Ti maul-ulilan nga namnama.

Itan ti panawen ti panagsusubli
sadiay lubong ti pudpudno a paskwa.

Wednesday, December 12, 2007

Bilyar

Siam nga bola laeng ti iyabut
Tapno malipatan ti iliw
Nga kalbit nga kalbit ita nga tiyempo
Ti lam-ek ken lagip. Mangrugi
Iti napigsa nga bugtak, masalsal bassit
Santo maiduron iti pakigtot tapno mawara
Dagiti sinalbag nga sensentimiento,
Nga nabayagen nga mangtagtagikwa
Kadagiti kunkunaen da nga gasat
Ti kinaadayo, ti iiyidayo ti tao
Sadiay lubong dagiti silpo ti puseg
Ti ragsak. Nu adda agkuralig
Dita maysa kadagiti innem nga abut ti isem,
Adda namnama nga maibus
Dagiti saksakit ti nakem.
Nu mapagasatan ket duwa wenno tallo
Ti maisyut, agpaunayen nu kwa nga lagto
Ti pitik ti puso. Mabalinton nga dalusan
Ti lamisaan ti biag, aglalo nu ti pulso
Ket adayu sadiay danag ken damag
Iti ili a nakayanakan. Pukawen laeng nu kwa
Ti panunot, iyaw-awan a kas grade one,
Tapno mapuntaan amin nga sirsirigen,
A papanan. Kasapulan nga innayaden
Ti garaw tapno mapatingngaan ti rigat
Ti naggapwan. Ti garawgaw nga tudok
Nakarkaro ti tapyok. Bassit laeng nga saltik
Nasagsagat ti gammat ken kagat ti gasat
Ken nalaklaka nu kwa nga saganaan
Ti dawat ti sumarsaruno nga sirpat.

Siam nga bola laeng ti iyabot
Ket addanakon sadiay. Ngem siyam
Met ti biag ti pusa nga agkirkiriring
Nga inaldaw uray pay madama
Ti sirpat, ti salsal, ti sayag
Ti ay-ayam. Siam nga bola
Nga agkurkuralig, kasla panagtalon
sadiay ili, nagasaten nu agballigi.
Siam ti biag ti duog nga rigat,
Madi pulos mapanawan
Madi pulos maiyaw-awan,
Kuldit nga kuldit, barukong makasangsangit.
Kada tudok, sumuksusuksok ditoy pusok,
Dagiti listaan ti utang nga madin mabilang,
Dagiti panagturay ti presyo uray dinno,
Dagiti panangraut ti sabali nga lupot kada malamot,
Nakipagmaymaysan iti kaawan ti namnama nga mapuntaan
Dagitoy siam nga bola a pakailiwliwaan.

Siam nga bola laeng.
Siam nga bola kuma laeng
Ket adda nakon sadiay.

Tuesday, December 4, 2007

Uni ti Langit

landok ti uni ti langit
ditoy Estados Unidos.
sumaysayag, lumaglagpas
iti lapayag dagiti banarbar
ti agganganat nga biag
sadiay ulep, kamkamaten da
Ti tayab ti presyo
sadiay ngatu.
kanayon nga puraw
dagiti kur-it. Magudgudwa
ket agbangbanggilat ti panagkitak.

ngem nu laeng kuma
ti uni ti langit ditoy
ket pangisubli amin
nga lualo ti panganan,
mayatak latta kuman
nga ti tiweng ti billit
ket maipupok, mataltalian.