Pinasadaak manen ti kaatiddog
Ti liwliwa, puseg ken pintas ti Monterey, CA,
Lauden 'toy naringgor a panagmaymaysa
Datao ditoy Dixon. Kadua dagiti gagayyem,
Tallo nga oras met ti panagpasalakan sadiay,
Ti pinagipulong iti adayo. Awan babawi nga umadayo manen,
Kasla agganat a makabaddek ti sabali a disso
Ngem pareho met laeng a langa ti kalkalsada,
Ti babbalay, ti banbantay wenno baybay
A pangsullat kadaytoy nabuttawan a namnama.
Inuksot manen ti aglawlaw 'tay siddaaw,
Agiduron paruar ti ragsak, mangpadpaddissaag ti alikuteg
Iti lugan ken mangpalpalittaak ti kamera
A mangipigpigket kadagiti isem tunggal panagpasyar sadiay.
Duapulo ken maysa a liwliwa, agsasaruno a nangindayun
Kadagiti katawa--a kasla Patapat, Ilocos Norte-- nga immuleg
Iti disso ti kapanunotan. Sadiay, sangapulo-ken-pito milya a dalan
Rinambakak manen ti iyaadayo, ti panagbaddek iti tiwel, welwel ken tiweng
Ti kapanunotan manipud sadiay ili a nakaiyanakan.
Napanunotko: adda met kastoy mi idiay ilik:
Nakarkaro pay ti dungngo ken apgad ti danum
Iti sileng iti kudil ti kabatoan ken kadaratan.
Naprespresko pay ti angin nga bumisongbisong kadagiti pingpeng,
Napigket, naayayo pay kadagiti turog dagiti bulong ken masmasetas.
Ngem adayonakon sadiay. Adayon sadiay.
Saanen magaw-at toy panunot ti tayab dagiti Agila iti malem.
Saanen a magawat toy pusok tay lagto dagiti lames iti karayan.
Adayon ti nasangpetak. Kasla kadagiti allon ditoy Monterey,
sumapsaplit laengen a lagip tay balay-kabbalayko.
