Idi dekada setenta, ubing pay ti panagkitak.
Ubing dagiti kolor ti badbado
Umanay a mangsisindi kadagiti damo a ragsak.
Ubing dagiti nagan ti tsintsinelas
A mangwangwangkar kadagiti damo nga alikuteg.
Ubing dagiti sam-it ti duldulse
A pangpalpalabbaga kadagiti damo nga isem.
Mangrugi kadagiti umuna a bannog ni itang
Ken inang nga aggapu kataltalunan,
Ubing idi dagiti sabet,
Ubing idi dagiti agpaspasaklot nga iliw
Masubsubwan, maikaskasson,
Makankantaan, mapatpaturog nga bisin.
Daydi angdod ni itang nga agannuwang
Daydi dungrit ni inang nga agallubo,
Masango danto pay laeng ti mangsapin
Kadagiti damo nga ibit,
Ti mangiyaw-awan kadagiti damo nga saludsod,
Ti mangubba, ti mangilikkilik,
Mangpakpakatawa, mangikiwkiwar
Ken mangpabpabaaw iti nabingaybingay
Nga danag iti rabaw ti lamisaan. Uray kape laeng
Ken innapuy ti mangbatbattut kadagiti ar-arapaap,
Ubing daydi damo nga raman ti rigat,
Ubing dagidi sangit nga apapputen ti buteng
Ken riing ni itang iti sarsardam,
Dagidi ar-arasaas ni inang
A banbantayan dagiti aso, ganso, bato
Iti karayan nga saan a matmaturog. Ammo
Da piman ti nagan ti agkabkaba nga ayat
Nga mangbunbunubon, manger-eras,
Mangtingtingngel kadagiti barikwas
Iti ubing nga nakaragragsak,
Iti ubing nga nakaul-ulimek,
Iti ubing nga saan nga agsalsaludsod.
Tallon a dekada ti napalabas,
Ubing paylaeng ti panagkitak,
Pasaksaklot,
Pasapsapin,
Paap-apput
Iti awan nagbaliwanna nga biag.
6 comments:
napimpintas nga adayo daydiay ubing a panunot ken isip nga agnanayon ngem daydiay inuubing a panunot ken isip, hehehe!
napintas a daniw, natiliwna ti ladawan ti away ken ti ramot ti kaputotan
Agyamanak ka Jim! Sapay kuma ta makalik to ti kauun-gan nga parte ti literatura iluko a kas kadagiti pinangiyebkas yo. Maysa ak laeng nga fan/sumursurot ti istilo yo.
Ka jim:
nalaing nga ubing daytoy ta nalaing ti maestrona!
saludsodem no sinno!
Wen ka Jim! Sino ngarud kuma ti di masursurwan nu nagguuneg met ngamin ti iwarwarsi na nga metapora? Malagip ko pay laeng idi klase mi iti creative writing, pinakitaan na kami ti maysa nga litrato ti 'nasalvaged'nga impurwak da diay likod ti seminaryo mi idi. Sana imbasa diay daniw na: "the innocence of the blade put an end to your adolescent daydreams and cheers...." Malagip ko paylaeng diay 'vacuity' nga daniw na maipapan ti outing mi idiay 'batobato.'
thanks, tommy boy. still in seattle ha? i take everthing you said as a compliment and pls do not take them back.
Manong Ariel, adda nak itan ditoy Sacramento. Saan ko maitured ti lamiis ti WA. Ken maysa, public school toy nastrekak. Agpahawaii nakton makaramut tapno makalang-ab nak met ah ti angin dagiti henyo.
Post a Comment