Sunday, February 18, 2007

istroberi

Ti ayat ket umulit ulit ulit ulit ulit
Kada tawen ngem awan pay nakitak
Nga istroberi a nagsaringit ti Pebrero.
Adun nga aggi-innayat ti mangial-allukun
Nga ti nabara a panawen
Ti kapipintasan a panagmula kadagitoy,
Ket agrusing da kano ti malarosas
Wenno nakalablabbasit nga kudil
Nga isaksakmol ken pagraragsakan uray dinno.

Ti ayat ket umulit ulit ulit ulit ulit
Kada tawen ket nasursurwakon ti agbilang
Kada segundo, minuto, ora, aldaw, lawas,
Bulan, tawen, uray pay ammuk nga ti Pebrero
Ket saan laeng isu ti panawen ti panagmumula
Ti nalangto ken nasam-it nga istroberi.

Wednesday, February 14, 2007

Kalpasan ti panagreregreg

Nalpasen ti panagreregreg
Ditoy Amerika ket kasla kadagidi bulong
Nga di maigawid dagidi panagbalbaliw
Ti bukbukod da nga kolor,
Saan na ammo ti agpakada ti panawen
Iti oras ti piligro.

Inyarasaas man ti angin dagiti senyal
Insuksok man ti ulep
Dagiti agibusen nga silap ken saranta
dagiti indayon idiay sanga,
Kasapulan nga umibbet ken agsubli
A kas daga, kasla toy iiyadayo ti tao
Tapno makaasideg met laeng a pudno.

Monday, February 12, 2007

Ubing ti Baggao

Idi dekada setenta, ubing pay ti panagkitak.
Ubing dagiti kolor ti badbado
Umanay a mangsisindi kadagiti damo a ragsak.
Ubing dagiti nagan ti tsintsinelas
A mangwangwangkar kadagiti damo nga alikuteg.
Ubing dagiti sam-it ti duldulse
A pangpalpalabbaga kadagiti damo nga isem.
Mangrugi kadagiti umuna a bannog ni itang
Ken inang nga aggapu kataltalunan,
Ubing idi dagiti sabet,
Ubing idi dagiti agpaspasaklot nga iliw
Masubsubwan, maikaskasson,
Makankantaan, mapatpaturog nga bisin.
Daydi angdod ni itang nga agannuwang
Daydi dungrit ni inang nga agallubo,
Masango danto pay laeng ti mangsapin
Kadagiti damo nga ibit,
Ti mangiyaw-awan kadagiti damo nga saludsod,
Ti mangubba, ti mangilikkilik,
Mangpakpakatawa, mangikiwkiwar
Ken mangpabpabaaw iti nabingaybingay
Nga danag iti rabaw ti lamisaan. Uray kape laeng
Ken innapuy ti mangbatbattut kadagiti ar-arapaap,
Ubing daydi damo nga raman ti rigat,
Ubing dagidi sangit nga apapputen ti buteng
Ken riing ni itang iti sarsardam,
Dagidi ar-arasaas ni inang
A banbantayan dagiti aso, ganso, bato
Iti karayan nga saan a matmaturog. Ammo
Da piman ti nagan ti agkabkaba nga ayat
Nga mangbunbunubon, manger-eras,
Mangtingtingngel kadagiti barikwas
Iti ubing nga nakaragragsak,
Iti ubing nga nakaul-ulimek,
Iti ubing nga saan nga agsalsaludsod.
Tallon a dekada ti napalabas,
Ubing paylaeng ti panagkitak,
Pasaksaklot,
Pasapsapin,
Paap-apput
Iti awan nagbaliwanna nga biag.