Bukel

Ditoy nan a naadal nga agtubo
ken agkalatkat toy bukel. Ammo nan
Ti mangidaplag kadagiti urat
Ditoy adayu nga nanam ti daga.
Uray pay agmaymaysa laeng
ken awan karuprupa na a bulong
Iti aglawlaw nga purpurusen ti lamiis,
Natibker latta dagiti karadap,
Iggem-iggem na dagiti kuyegyeg
Nga nabayagen nga tinagikwa
ti limed ken liday kada agsapa.
Kasla makiay-ayayam laeng
Iti panawen. Lumned tumpaw
A kas isem ti ubing, awan sao na nu agriing.
Kas kadagiti takder ti kaykayo ti arubayan,
Mapugtuwan nanto met laeng dagiti ar-arasaas
Ti angin. Dagiti uni ti billit, didanto ilimed
Dagiti pakdaar ti bulan, ti panaglabas
Na ditoy, dita, diay bangir nga disso
A naggapwan tapno maatur nanto
Dagiti payapay ti bulbulong,
Dagiti tangad sadiay ulep,
Uray saanton nga makasubli,
Awan met ketdi ukis nga sumabali.