Uray dagiti awan garadgad na
nga urnos ti Amerika:
Tayag ken taer dagiti edipisyo,
Linis ken lawa dagiti kalkalsada,
Pudaw ken pintas dagiti babbai,
Ket di da kaya a gamruten
Dagitoy mail-iliw nga mata.
Kada biyernes ti malem ti panagawid,
Agpukaw laeng dagiti rupa,
kolor ken kur-it ti pagnaan. Awan anus
Da nga mangawis ti talyaw ken siddaaw
Ti puso. Maiwalwalin pati dagiti boses
Nga ngalngalngalen da. Marunaw amin
Nga banag, damag, lasag, imbag
Ti kanito ket tumartaray ti panunot
Iti sesenta a milya per ora iti bus # 183.
Ruta: Mangrugi Kent Ingana Bacagan, Baggao
Ti nakaat-atiddog nga problema.
Awan pay ti tapok,
Awan pay ti ligsong,
Awan pay ti bagyo, layos, el niño
La niña a nalabasak: adayu
Nga agpayso ti nakayanakak.
Awan pay dagiti nangingisit
Nga gaget iti siksiko ti taltalon.
Awan pay dagiti agduduog nga rigrigat
Nga tartaraknen dagiti rinibu-ribo nga ektarya
Ti mais, ti pagay, ti balatung, ti tabako,
Nga nabayagen nga inkamada ti utang,
Ti porsiyento ti paltog wenno pakdaar
Sadiay Munisipiyo ti makinkukwa ti daga,
Makinkukwa ti pagkilwan, ti kalkuleytor, ti kwarta
A panggatang met laeng
Ti mais, ti pagay, ti balatung, ti tabako
Nga awan patingana nga rigat: Adayo pay
Nga agpayso ti nakayanakak.
Ngem imbag laengen ta awan tapok ditoy,
Awan ligsong ditoy, awan layos ditoy.
Adda kuma pambar ko nga saan nga bumaba
Ditoy sarawiswis ti gura ken iliw ditoy barukong ko.
8 comments:
Aloha, Tommy:
I am putting together a trilingual Ilokano, filipino (with an F), and English writing by and about Ilokanos. Would it be ok if I included your works? I cannot promise an honorarium but you will get some complimentary copies.
The copyright of your works will remain yours. Please say yes.
Mahalo.
Manong ariel, pakadayawak dayta panangiraman mo kaniak. Banatam latta manong. Uray pay ketdi saan mo dawatenen ti pammalubos kon. More power!
narigat nga agpayso ti umadayo a kas ti pagpaspasaram kabsat.
Ti iliw nga ep-ep-epem iti tunggal kawaw a malem.
Sabali a lubong, sabali nga rupa ken sabali a isem.
Ti laeng konsolasionyo dita ket ti lagipyo iti napanawanyo. Dagiti katawa ken isem ti kababagian a napanawan a mangpunpunno iti tured pakinakem.
Goodluck kabsat!
napintas daytoy daniwmo, george. dika kadin agaw-awid idiay baggao, aya?
Hi Roy, jfi ken manong Ariel! agbiag kayo! Agyamanak ti yuumay yo. Resulta ti iliw ko met a daytoy roy. Nagrigat ti agmaymaysa gayam. nagdakkel ti babawik nga napan ditoy. Nu makaurnong nak laeng bassit ket agawid nakon. Awan duma na ti Pinas.
Hello Jim! Maragsakanak ti panagdaw-as mo ditoy. Bagim gayam dayta nagan nga nabayag kon nga madamdamag, maysa nga nakalalaing nga mannurat. Kapagpaysoaanna ket ikarkaradap ko ti agsurat ti Ilokano ta adda laok na nga itawis nu dadduma.
Post a Comment